最新上映電影

eventimage
片名:SECOND ACT | 職場女王攻略
產地:USA | 美國
發行商:Intercontinental Film Distributors (H.K.) Ltd|洲立影片發行(香港)有限公司
導演:Peter Segal|彼得史高
演員:Jennifer Lopez|珍妮花露柏絲, Vanessa Hudgens|雲妮莎夏芝絲, Leah Remini|莉雅李美莉, Milo Ventimiglia|米路雲提米利亞
電影分級:IIA
片種:COMEDY | 喜劇, ROMANCE | 愛情
輪次:1
片長(分鐘):104
上映日期:2019-01-24

男人40一枝花,女人40都可以誇啦啦!年齡不過係數字,心態先至決定境界。由久未現身大銀幕嘅樂壇天后珍妮花露柏絲(Jennifer Lopez)主演兼監製、《特務S嘜》(Get Smart)彼得薛高(Peter Segal)執導嘅爆笑新作《職場女王攻略》(Second Act)教精大家,就算係熟女,就算冇學歷,但只要一日有夢,一日都仲可以「妞」轉人生!一班傍住職場靚姐珍妮花露柏絲上位做高層嘅演員仲包括《地心探險記2:世外秘島》(Journey 2: The Mysterious Island)女星雲妮莎夏芝絲(Vanessa Hudgens)、艾美獎女星莉雅李美莉(Leah Remini)、冠軍收視劇集《This Is Us》艾美獎提名視帝米路雲提米利亞(Milo Ventimiglia)等。

冇學歷 有實力  吹水、扮勁,阿姐最煞食

喺超級市場打工嘅美雅(珍妮花露柏絲 飾)工作表現一向完美,弊在爭張沙紙先升到做經理。眼見公司請個高分低能嘅四眼薯嘜嚟做佢阿頭,美雅當然唔甘心,但唔通4字頭先學人追夢?點知閨密祖安(莉雅李美莉 飾)嘅乖仔偷偷地幫佢「改造」咗份完美嘅CV寄去應徵,令佢一頭霧水咁通過面試,仲唔覺意入咗跨國企業,做埋萬人之上嘅真正高層﹗雖然獲得夢寐以求嘅工作同生活,但係同相戀多年嘅男友(米路雲提米利亞 飾)分手,公司副總裁蘇兒(雲妮莎夏芝絲 飾)俾佢嘅壓力同挑戰亦非同小可!美雅努力面對人生重大轉變之餘,為免有一日紙終於包唔住火,佢更加要捉緊機會向世界證明,佢嘅實力絕對抵得住一紙學歷!